«Ауыл — ел бесігі» бағдарламасы шеңберінде 62 жоба іске асырылды – Мұхамбетов

Бүгін Архимед Мұхамбетов облыс әкімдігінің отырысын өткізіп, оның барысында «Бизнестің жол картасы-2025» бизнесті қолдау мен дамытудың мемлекеттік бағдарламасын іске асыру қорытындыларын қарастырды деп хабарлайды tobyl-torgai.kz.

Мемлекеттік бағдарламаны іске асыруға 2021 жылы 7,1 млрд теңге бөлінді. Сондай-ақ өткен жылы 1 744 жобаны іске асыруға несиелерді субсидиялауға және кепілдендіруге 75,3 млрд теңге бөлінді.

Біздің облыста «БЖК» жүзеге асыруды екінші деңгейдегі тоғыз банк және бір лизингтік компания жүзеге асырады.
Биылдан бастап «Бизнестің жол картасы» іс-шараларын іске асыру Қазақстан Республикасы Үкіметінің 2021 жылғы 12 қазандағы қаулысымен бекітілген кәсіпкерлікті дамыту жөніндегі 2021-2025 жылдарға арналған ұлттық жобаның екінші бағыты шеңберінде жүзеге асырылатын болады.
Кәсіпкерлік субъектілеріне қаржылық қолдау шараларын ұсыну «кәсіпкерлік субъектілері үшін қаржыландырудың қолжетімділігін арттыру» ұлттық жобасының міндетіне бекітілген, оларға ағымдағы жылы 4,8 млрд теңге көзделген, — деп жазды әкім өзінің instagram-парақшасында.

Бұдан әрі 2022 жылға арналған мемлекеттік сатып алуды ұйымдастыру қарастырылды.

Жергілікті атқарушы органдар үшін негізгі міндет мемлекеттік сатып алу рәсімдерін жүзеге асырумен тығыз байланысты жергілікті бюджетті сапалы атқару болып табылады.

Мәселен, Қостанай облысының 1 123 тапсырыс берушісі 2021 жылы жалпы сомасы 140,4 млрд теңгеге 15 866 мемлекеттік сатып алуды өткізді. Сондай-ақ 2021 жылы 102,1 млрд теңге сомасына 187 бюджеттік инвестициялық жобаны іске асыру басталды, сондай-ақ «Ауыл Ел-бесігі» бағдарламасы шеңберінде 6,7 млрд теңге сомасына 62 жоба іске асырылды, — дейді облыс әкімі.

Биыл қаңтардағы жағдай бойынша облыста 1 103 тапсырыс беруші жұмыс істейді.

2022 жылы жалпы сомасы 44,6 млрд теңгеге 124 бюджеттік инвестициялық жобаны іске асыру жоспарлануда.
Сонымен қатар 2021 жылғы 15 қарашада түрлі нормативтік актілерге, оның ішінде «мемлекеттік сатып алу туралы» Қазақстан Республикасының Заңына өзгерістер енгізетін заң қабылданды, — деді Архимед Мұхамбетов.

Отырыс қорытындысы бойынша облыс басшысы қала мен аудан әкімдеріне, облыстық басқармалардың басшыларына БЖК бойынша ақпараттық-түсіндіру жұмыстарын жандандыруды, сондай-ақ мемлекеттік сатып алуға қатысты өзгерістер туралы тапсырма берді.

фото: ашық дереккөз