Тобылдық отбасыға тұрғын үй берілді

Таран ауданының Тобыл елді мекенінде көпбалалы отбасына тұрғын үй кілті тапсырылды деп хабарлайды ҚазАқпарат.

«Нұр Отан» партиясы Елбасының тапсырмасы бойынша көпбалалы, әлеуметтік жағынан аз қамтылған отбасыларды қолдауға бағытталған «Бақытты отбасы» жобасын бастағаны белгілі. Жоба аясында Тобыл елді мекенінде тұратын Смирновтар отбасына тұрғын үй берілді. Отағасы Андрей Смирновтың айтуынша, бұл күтпеген сыйлық болды.

«Біз 5 бала тәрбиелеп отырмыз. Расында да, үйіміздің тозығы жеткен еді, жылу ұстамайды, электр жарығы да бірде бар, бірде жоқ. Бізге осындай қуаныш сыйлаған жанашырларға алғысым шексіз», — деді ол.

Тұрмысы төмен жанұяға жаңа үйдің кілтін «БК-Стройпром» ЖШС тапсырды.

«Бүгін көпбалалы отбасыға қол ұшын создық. Өңірдегі барлық кәсіпкерді, шағын және орта бизнес өкілдерін осындай жанұяларға көмектесуге шақырамын. Қолдауға мұқтаж, жағдайы төмен мұндай шаңырақтар назардан тыс қалмауы тиіс», — дейді серіктестік директоры Сергей Ким.

«Нұр Отан» партиясы облыстық филиалының мәліметінше, Таран ауданында жыл басынан 20 ақпанға дейін жүз отбасыға көмек көрсетілген. Оған 826 900 теңге жұмсалды. 86 отбасы азық-түлік, 6 шаңырақ қатты отын, 4 үй ақша түрінде көмек алған.

Тобыл-Торғай-ақпарат

 

Мынаны да қараңыз

Азаматтардың құқығы бәрінен биік тұруы керек

«Әділдік және өркендеу» қоғамдық қорының жергілікті өкілдері Қостанай облыстық ардагерлер кеңесі басшылығымен кездесті. Кеңес төрағасы ...