Қостанайда қос ЖОО бірігіп, аймақтық университетке айналады

Биылғы оқу жылында Ахмет Байтұрсынов атындағы Қостанай мемлекеттік университеті мен Сұлтанғазин университеті бірігіп, аймақтық оқу орнына айналады деп хабарлайды ҚазАқпарат тілшісі.

Оқу орындарының бірігуі Білім мен ғылымды дамытудың 2020-2025 жылдарға арналған мемлекеттік бағдарламасы шеңберінде іске асып отыр. А.Байтұрсынов атындағы ҚМУ ректоры Алма Дощанованың айтуынша, екі университетті біріктіру туралы Қазақстан Республикасының Білім және ғылым министрлігі шешім қабылдады. Сол шешімнің негізінде «Жол картасы» жасалды.

«Оқу орны А.Байтұрсынов атындағы Қостанай аймақтық университеті деп аталады. Мұнда барлығы 8000 студент білім алады. Бүгінде оқу орындарының мүлкін бағалау жүргізілуде. Бұл жұмысты Қаржы министрлігінің Мемлекеттік мүлік және жекешелендіру комитеті атқаруда. Біз оқу орнының алдағы бес жылдағы дамыту бағдарламасын қабылдадық. Негізгі мақсатымыз – білім беру жағынан ғана емес, сонымен қатар, ғылыми зерттеулер деңгейінде республикадағы ең үздік университеттердің қатарында болу. Бұған барлық мүмкіндік бар. Алдағы уақытта аймақтық университет оқытушыларының жалақысы өседі» деді Алма Дощанова.

Университетте барлық мамандық бойынша біліктілік емтиханын тапсыратын жұмыс берушілер кеңесі жұмыс істейді. Сонымен қатар мемлекеттік-жекеменшік серіктестік аясында 500 орындық жаңа жатақхана салынады.

Мынаны да қараңыз

А. Мұхамбетов: Облыс спорты айтулы жаңалықтарға толы болды

Қостанай облысының әкімі Архимед Мұхамбетов халыққа есеп беру жиынында спорт саласындағы 2019 жылдың басты жетістіктері ...

Пікір қалдыру

Сіздің e-mail жарияланбайды. Толтырылуы міндетті *