Жітіқарада ер адам баласына алимент төлеуі үшін пәтерін сатты

Қостанай облысының Жітіқара ауданында бірнеше жылдан бері баласына алимент төлемеген азамат пәтерін сатуға мәжбүр болды.

ҚазАқпараттың хабарлауынша, бұл мәліметті Қостанай облысы жеке сот орындаушыларының аймақтық палатасы таратты.

Ер адам баласын асырап-бағуға 1,5 млн теңге қарыз болып қалған.

«Бұрын бұл іспен мемлекеттік сот орындаушы айналысқан болатын, кейіннен шағымданған келіншек өз арызын қайтарып алды. Оның бұрынғы күйеуі алиментті уақытылы төлеп тұруға уәдет еткен, алайда, сөзінде тұрмады. Сосын ол бізден көмек сұрап келді. Мен бірден жауапкердің тұратын жерін анықтап, жұмыс істеген жерлеріне сұрау салып, жалақысының қанша екенін анықтадым. Үш жылда қарыз 1,5 млн теңгеге жеткен» дейді сот орындаушы Ботагөз Исмурзина.

Аудан тұрғыны біраз уақыт вахта әдісімен жұмыс істеген, қазір Жітіқараға оралып, алтын өндіретін компанияда еңбек етіп жүр. Ұзаққа созылған әңгімеден кейін жауапкер өзінің пәтерін сатып, қарызын толық жабатын болып келісті. Ол далада қалмайды, уақытша ата-анасының қолында тұрады. Баланың әкесі бұдан былай алиментті уақытында төлеп тұруға уәде етті.

«Бір ғана Жітіқара ауданында алиментке қатысты 600 іс өндірісте жатыр. Оның ішінде перзентіне алимент төлемей қашып жүрген аналар да бар. Өткен жылы осындай ананың біреуін әкімшілік жауапкершілікке тарттық. Екі бала әкесімен бірге тұрады. Ал биыл сол ана балаларының алдындағы қарызын өтемегені үшін енді қылмыстық жауапқа тартылып, шартты жазаға кесілді. Қостанай облысында алимент бойынша 13 500 іс қаралып жатыр, алимент қарызы 100 млн теңгеден асып кеткен» дейді Қостанай облысы жеке сот орындаушылары аймақтық палатасының басшысы Несібелі Бәсенова.

Сот орындаушылары мұндай істермен танысқанда борышкерлерге түсіністікпен қарауға тырысады. Мысалы, Ботагөз Исмурзина таяуда балаларына 200 мың теңге қарыз болған әкенің жұмысқа орналасуына көмектесті. Соның арқасында ол азамат екі айда бүкіл қарызынан құтылды және екі қолға бір күрек тапты.

 

Мынаны да қараңыз

Карантин режимін бұзғандар жауапқа тартылады — Архимед Мұхамбетов

Қостанай облысында коронавирустық инфекцияның таралуына жол бермеу бойынша жедел штаб отырысы өткізілді деп хабарлайды ҚазАқпарат. ...