Тобыл-Торғай tobyl-torgai.kz
Торғайда Жангелдин ауданы Әйелдер күштері альянсы 2026 жылдың алғашқы отырысын өткізді. Көшбасшы әйелдер бас қосқан бұл жиын – жаңа жылдың жұмыс бағытын айқындаған маңызды кездесу болды, деп хабарлайды tobyl-torgai.kz.
Жиында клубтың жаңартылған құрамы бекітіліп, жылдық жұмыс жоспары кеңінен талқыланды. Алдағы іс-шаралардың бағыт-бағдары нақтыланып, жауапты тұлғалар белгіленді және өткізу мерзімдері бекітілді. Жоспарға сәйкес, клуб мүшелерінің отырысы тоқсанына бір рет тұрақты түрде ұйымдастырылып отырады.
Отырыста әйелдердің қоғамдық белсенділігін арттыру, ауыл-аймақтағы әлеуметтік бастамаларды қолдау, отбасы құндылықтарын нығайту және кәсіпкерлікке ынталандыру мәселелері де сөз болды. Бұл жұмыстар Мемлекет басшысы Қасым-Жомарт Тоқаевтың азаматтық қоғамды дамыту, әйелдердің шешім қабылдау үдерісіндегі рөлін күшейту жөніндегі саясатына үндес келеді.
Торғай төрінде өткен басқосу – бірлік пен жауапкершіліктің көрінісі. Көшбасшы әйелдердің жүйелі жұмысы өңірдің әлеуметтік дамуына нақты үлес қосары анық, — дейді Жангелдин ауданы Әйелдер күштері альянсының мүшесі Гүлім Ысмағұл.
Фото: Жангелдин ауданы Әйелдер күштері альянсы
