Тобыл-Торғай tobyl-torgai.kz
Қостанай облысы Әулиекөл ауданындағы өртке байланысты кейінге шегірілген Ахмет Байтұрсынұлының 150 жылдық мерейтойына арналған шаралар 1 қазанда өтеді, деп хабарлайды tobyl-torgai.kz Halyq Uni сайтына сілтеме жасап.
Биыл 3-5 қыркүйек күндеріне жоспарланған Ахмет Байтұрсынұлының 150 жылдық мерейтойына арналған іс-шаралар Әулиекөл ауданындағы төтенше жағдайдың салдарынан кейінге шегерілген болатын. Үкімет пен жергілікті атқарушы органдар тарапынан зардап шеккен тұрғындарға көмек көрсетілді.
Қостанай облысы Мәдениет басқармасының директоры Ерлан Қалмақовтың айтуынша, өңірдегі жағдайдың тұрақталғанына байланысты Ұлт ұстазының мерейтойы 1 қазан күні атап өтілетін болады. Мерекелік шаралар Ахмет Байтұрсынұлы және Торғай ауылдарында өтеді.
Бағдарлама бойынша Сарытүбек қонысында Ахмет Байтұрсынұлының кесенесіне тағзым жасау, музей-үйдің тұсаукесері өтіп, ас беріледі. Торғай ауылында спорттық шаралар (қазақ күресі, ат жарысы), ескерткіштің ашылуы, реэкспозициядан кейінгі А.Байтұрсынұлы мен М.Дулатұлының әдеби музейінің тұсаукесері, ғылыми-практикалық конференция жоспарланған.
Еске сала кетсек, Қостанайдағы алапат өрт кезінде өңірге жұмыс сапарымен барған Президент Қасым-Жомарт Тоқаев Ахмет Байтұрсынұлының мерейтойына қатысты пікір білдірген еді. Ол жолы Мемлекет басшысы өртпен байланысты жағдай тұрақталып, зардап шеккендерге көмек көрсетілген соң Ахмет Байтұрсынұлының туған жеріне баратынын мәлімдеген болатын.
фото: visitkostanay.kz
