Тобыл-Торғай tobyl-torgai.kz
Қоғам қайраткері Мұрат Әбенов Facebook әлеуметтік желісіндегі парақшасында қоғамда наразылық тудырған уақытша тіркеу мәселесіне қатысты пікірін білдіріп, ұсыныс жасады. Ол тіркеуді тоқтата тұрып, жан-жақты талқылау үшін Қоғамдық комиссия құруды ұсынған екен деп хабарлайды Baq.kz тілшісі.
Еске сала кетсек, бүгiн Үкiмет отырысында ҚР Премьер-Министрi Бақытжан Сағынтаев тiркеу енгiзiлгеннен кейiн ХҚКО-ларда үлкен кезектiң қалыптасқанын және бұның, жалпы тіркеудің халық арасында наразылық тудырғанын айтты. Премьер-Министр тiркеуге қатысты сұрақтардың тым көп екенiн және түсiндiру жұмыстарының дұрыс жүргiзiлмегенiн де тілге тиек етті. Б.Сағынтаев Қ.Қасымовқа халыққа тікелей қатысы бар заң бойынша түсiндiру жұмыстарын ертерек бастау керек едi дедi. Сондай-ақ, Премьер-Министр жаппай тiркелуге көшпес бұрын электрондық тiркелу жүйесiн әзiрлеу керектiгiн де баса айтты.
Сондай-ақ, Үкімет отырысынан кейін Қ.Қасымов тiлшiлердiң «қазақстандықтардың учаскелiк полицейлерге есiк ашпауға құқығы бар ма?» деген сұрағына «жақсы, ашпаңыздар, бiз тексерудiң басқа амалын табамыз» деп жауап қатқан еді.
Атап өтсек, уақытша тіркеу туралы заңға 2016 жылдың 22 желтоқсанында қол қойылып, биылғы жылдың 7 қаңтарында ол күшіне енді.
